Winnares van het DLF-Drèents Liedtiesfestival 2017 -Isa Zwart- nimp diel an een Europees Liedtiesfestival veur minderheidstaolen op het SUNS EUROPE festival dat holden wordt van 30 november tot 2 december in Udine (Italie) . Een vakjury keus acht finalisten oet meer as 30 inzendings oet hiel Europa. Isa Zwart zal met het liedtien ‘Mamme See’ -dat schreven is deur Roy Keuter en Rowdy Prins- het Nedersaksisch vertegenwoordigen tussen zeuven aandere Europese minderheidstaolen.

De andere finalisten van dit liedtiesfestival bint:

LA BASU ‘Ni naiz iztotz erregina’ (Baskisch)
BAND PRES LLAREGGUB ‘Bradwr’ (Welsh)
FRANCO GIORDANI ‘Revelli’ (Friulisch)
UÈI Ai ‘mamà’ (Occitaans)
TUMASCH È ‘Jeu sai buc’ (Retro-Romaans)
TINY FEET ‘Mogerioù Mor’ (Bretons)
ESPOSA ‘Xardín interior’ (Galicies)

Veur het daarde jaor brengt ‘Suns Europe’ olde taolen en moderne vörms van communicatie samen. Een festival rondum kuunst, verbinding, talent, taolpluralisme en creativiteit. Op het festival staot meziek, film, theater en literatuur in minderheidstaolen van het ‘Oude Continent’ centraal.

De Stichting REUR -organisator van het DLF-Drèents Liedtiesfestival- is bezunder wies met de oetverkiezing van Isa Zwart veur dit prestigieuze evenement. Stichting REUR zal van de reis, de veurbereidings en de finale van het Europese liedtiesfestival een (live-)verslag maken dat te volgen is via de sociale media.

Het heufdevenement -waor Isa Zwart an dielnimp- vindt plaots op zaoterdag 2 december um 21.00 uur in Teatro Giovanni da Udine.

Suns Europe is een preject van Cooperativa Informazione Friulana (oetgever van Radio Onde Furlane) en Cooperativa Puntozero, met de sponsoring van Arlef (Agjenzie Regioâl pe Lenghe Furlane - Regionaal Agentschap veur Friulische taol), Friuli Venezia Giulia en Fondazion Friuli, in samenwarking met de gemiente Udine, Fondazione Teatro Nuovo Giovanni da Udine, het Filmfestival van Babel en stiet under auspiciën van de Raod van Europa.

Meer infermatie kuj vinden op de webstee van SUNS EUROPE

Weerum