Drentse vlag Nederlandse vlag

Jolien Wonink-Dijkstra wint ningde editie van het Drèents Liedtiesfestival!


14 mei 2021

Vanaovend was de ningde editie van het Drèents Liedtiesfestival. In de finale in het ATLAS Theater in Emmen kreeg Jolien Wonink-Dijkstra met het nummer 'Vuul (oh oh oh)' de mieste stemmen. De tekst van het nummer wuur schreven deur Jolien Wonink-Dijkstra & Hilko Stoffers, de meziek kwam van de haand van Erik Koerts, Robin Muilwijk & Hilko Stoffers.
Het Drèents Liedtiesfestival wordt organiseerd deur de Stichting REUR in samenwarking met RTV Drenthe en het Atlas Theater in Emmen.

Der was as altied een vakjury -bestaonde oet drie jurygroepen- en het pebliek kun gedurende de live-oetzending van RTV Drenthe via sms heur stem oetbrengen. De aandere negen dielnimmers aan het DLF 21 waren: Dennis Hendriks, Jaap Lamfers & Marianne Veenstra, GERS, Lilian van Lottum, Anna Jents, Boes & Boels, Skroetbalg, Maurice Mulderij en Rick Hilberts.

De veurige editie in 2019 van het Drèents Liedtiesfestival wuur wunnen deur Leon Moorman met het nummer 'Knooin'. Leon trad vanaovend op met zien band en speulde een paar liedties van zijn neie album dat gistern officieel oetkwam.
Daarnaost langde hie vanaovend de pries oet an zien opvolger Jolien Wonink-Dijkstra.

Met de winst in de buus zal Jolien later dit jaor dielnimmen an het Europees Songfestival veur Minderheidstaolen op het Suns Europe festival in Udine, waor zie het Nedersaksisch vertegenwoordigen zal.

Jolien Wonink-Dijkstra wint Drèents Liedtiesfestival 2021 - foto: Bart de Nes
Jolien Wonink-Dijkstra met heur band (foto: Bart de Nes)

LOGO DLF18

Weerum