Drentse vlag Nederlandse vlag

Vakjury finale Drèents Liedtiesfestival bekend!


18 mei 2019

De leden van de vakjury veur de achtste editie van het Drèents Liedtiesfestival op 22 juni in het Atlas Theater in Emmen bint bekend.

Stichting REUR is bezonder wies met de leden van de vakjury van dit jaor, die bestiet oet Marlene Bakker, Bert Haandrikman en Edwin Jongedijk.

Tied um ies even met de lu in de kunde te kommen!!

Bert Haandrikman

Bert Haandikman - Omroep Max

Bert Haandrikman (Börger, 26 september 1971) is prissentator bij Omroep Max op NPO Radio 5. Op zie zender prissenteerd e zien luchpregram ‘Haandrikman!’ -van maandag ten en met dunderdag, tussen 12.00 en 14.00 uur.
Daorveur was Bert helderop wat jaor te heuren op NPO Radio 2. Meermaols in de ‘Top 2000’ en in zien iegen radiograms vanzölf, zoas ‘Helemaal Haandrikman’. Veur dat pregram wuur hum in 2017 de Gouden RadioRing oetlangd. Boetendes wuur Bert in 2013 en 2015 underscheiden met de Zilveren RadioSter.

Bert is geboren en opgruid op een boerderij in Börger. Thoes wuur der Drèents proot. En het Drèents is e nooit hielemaol verleerd. Dat heur ij ok weerum in zien radiopregrams, waor met riegelmaot Drèentstaolige liedties veurbijkomt.

Marlene Bakker

Marlene Bakker

Marlene Bakker is een bezundere verschiening in de Grunningstaolige wereld.
Heur prachtige stem en iegen meziek geeft heur een iegen stee binnen de Nederlaandse meziek.
Heur debuutplaat RAIFF -verschenen in 2018- wuur landelk prezen en kreeg u.a. een viefsterren recensie in het Dagblad van het Noorden en de Leeuwarder Courant. Ok Heaven Popmagazine en de Music Maker waren vol lof over RAIFFen gaven de langspeuler veer sterren.
‘Tot non toe -wat mij anbelangt- het beste album van 2018’, zee Frits Spits op NPO Radio 1 in zien pregram De Taalstaat.
Veur de single Waarkhanden wuur Marlene de Bosklopper Bokoal veurde beste Grunningstaolige single  van 2017 oetlangt.
Begun dit jaor wuur Marlene ok de DvhN-Streektaolpries gund veur heur album RAIFF en speulde zie as veurpregram gedurende de clubtour van Daniël Lohues.
In 2020 giet Marlene op theatertournee, intied wordt der warkt an een neie langspeuler.

Edwin Jongedijk

Edwin Jongedijk

Edwin Jongedijk is al helderop wat jaor een bekende naam in de Nedersaksische streektaolwereld.
As Grunningstaolige zanger en liedtiesschriever is e met riegelmaot te heuren en te zien bij de regionale umroepen in het Noorden en Oosten van ’t laand. Edwin treedt op as solo-artiest en hef intied drie langspeulers maakt. Wieder is e lid van het Grunniger gezelschap De Troebadoers, een samenwarking met Jan Henk de Groot en Alex Vissering. De Troebadoers bint in de leste jaoren meermaols te zien west in de noordelke theaters en muken samen in 2015 het album ‘De Veenhoes Sessies’ 2015 en ‘Onbekinde wegen’ (2018)
Boeten het zingen en schrieven in de streektaol is Edwin actief met iegen Engelstaolig wark met de band Taney Town. Sinds 2003 hef e daor verscheiden toers met daon deur Duutslaand en America. Met Taney Town hef e veer langspeulers opnummen.
Nog niet zo lang leden is Edwin begund met een neie band: Slow Movin' Outlaws. Zie brengt een eerbeteun an de ‘Outlaw Country’ met de meziek van u.a. Waylon Jennings, Johnny Cash, Willie Nelson, Johnny Paycheck en Jerry Reed.

Tot slot is Edwin veurzitter van Stichting REUR.

Weerum